लोकप्रिय अभिनेता सरोज खनालले नेपाली चलचित्र ‘बगान’बाट निर्देशनमा डेब्यू गरेका छन्। आइतबार काठमाडौंको चाबहिलस्थित चलचित्र विकास बोर्डको हलमा उक्त चलचित्र बारे जानकारी दिँदै ‘इन्ट्रो टिजर’ र पहिलो गीत ‘तिम्रो सुन्दर आँखा’ सार्वजनिक गरिएको छ।
चलचित्रमा सरोज खनालसँगै नीर शाह, वसुन्धरा भुषाल, मिथिला शर्मा, करिश्मा मानन्धर, आकाश श्रेष्ठ, नव अभिनेत्री प्रमिला कार्कीलगायतको अभिनय रहेको छ।
सार्वजनिक ‘तिम्रो सुन्दर आँखा’ गीतमा सुरेश वाग्लेको शब्द, सुभाष भुषालको संगीत छ भने सुगम पोखरेल र अस्मिता अधिकारीले स्वर दिएका छन्। गीतको भिडियोमा आकाश र प्रमिला फिचर्ड छन्। भिडियोलाई कविराज गहतराजले कोरियोग्राफी छन । गीतलाई चलचित्रमा कथावाचनको रुपमा प्रयोग गरिएको निर्देशक खनालले बताए ।
निर्देशक तथा अभिनेता खनालले आफ्नो जीवनकालमा चलचित्रहरुमा अभिनय गरेर सिकेको ज्ञान र अनुभवलाई निर्देशनमा प्रयोग गर्ने प्रयास गरेको बताए। उनले आफूले निर्देशन गरेको चलचित्रले समाज परिवर्तनमा ठूलो भूमिका खेल्ने विश्वास समेत व्यक्त गरे। चलचित्र हेरेर हलबाट निस्कँदा एकपटक मान्छेहरू सोच्न बाध्य हुनेछन् उनले भने ।
नेपाली वेबसाइट डटकमको प्रस्तुति रहेको ‘बगान’का निर्माता सुरेश वाग्ले हुन् भने कार्यकारी निर्माता चर्चित अभिनेत्री करिश्मा मानन्धर हुन्।
चलचित्रमा गौरीशंकर धुजुको डीओपी, उत्सव दाहालको छायांकन, अर्जुन जिसी, राजेश शाह र सन्देश शाहको सम्पादन, समिर मियाँको भिएफएक्स तथा रेनिश फागोको कलर करेक्सन रहेको छ। साउन्ड मिक्सिङ मुकेश शाह र ब्याकग्राउण्ड स्कोर द एक्स ब्याण्डका शिव मुखियाको रहेको छ।
